Job 13

1 “Amehlo ami asekubonile konke lokhu, izindlebe zami zikuzwile zakuqedisisa lokhu.

2 Elikwaziyo lina lami ngiyakwazi; kalingcono ngalutho kulami.

3 Kodwa ngiloyisa ukukhuluma loSomandla, ngiphikisane loNkulunkulu ngendaba yami.

4 Kodwa lina lingigcona ngamanga; lonke liyizinyanga ezingelamsebenzi!

5 Thulani lithi zwi! Lokho kungaba yikuhlakanipha kini.

6 Zwanini-ke manje engikutshoyo; lalelani ukuncenga kwezindebe zami.

7 Lingakhuluma okubi limele uNkulunkulu na? Lingamkhulumela inkohliso na?

8 Limtshengisa ukuthi liyabandlulula yini? Yini elimkhulumelayo uNkulunkulu akutshoyo?

9 Kungalilungela yini nxa engalihlola? Kambe lingamkhohlisa njengoba lingakhohlisa abantu?

10 Ngempela angalithethisa nxa lingabe litshengisa ukubandlulula.

11 Inkazimulo yakhe ingaze yalesabisa na? Ukwesabeka kwakhe kungaze kwalehlela na?

12 Izitsho zenu ziyizaga zomlotha; lezivikelo zenu yizivikelo zebumba kuphela.

13 “Thulani ngikhulume mina; kungivelele loba kuyini okuvelayo.

14 Ngizifakelani engozini na ngiphathe impilo yami ezandleni?

15 Angaze angibulale kodwa ngizakwala ngithemba kuye; ngizazivikela izindlela zami phambi kwakhe.

16 Ngeqiniso lokhu kuzangikhulula, ngoba kakho umuntu ongakholwayo ongasondela kuye!

17 Ake lilalele kuhle amazwi ami; vulani izindlebe zenu lizwe engikutshoyo.

18 Manje-ke njengoba sengiyilungisile indaba yami, Ngiyabona ukuthi ngizakhululwa.

19 Ngubani kambe ongangethesa icala? Aluba ekhona, kangihle ngithule ngiphele ngife.

20 “Akungiphe lezi izinto ezimbili nje, hawu Nkulunkulu, lapho-ke angiyikukucatshela:

21 Sisusele khatshana lami isandla sakho, ukhawule ukungethusa ngokwesabeka kwakho.

22 Ubusungibizela ecaleni, ngizaphendula, kumbe ungiyekele ngikhulume, lawe uphendule.

23 Sengenze iziphambeko lezono ezinganani na? Ngitshengisa isiphambeko sami lesono sami.

24 Kungani ufihla ubuso bakho ungithathe njengesitha sakho?

25 Uzahluphana lehlamvu eliphetshulwa ngumoya na? Uzaxotshana lomule owomileyo na?

26 Ngokuba ubhala izinto ezibuhlungu ngami ungenze ngidle ilifa lezono zobutsha bami.

27 Ukhina izinyawo zami ngezibopho; ulandelela zonke izindlela zami ngokudweba uphawu ezinyathelweni zezinyawo zami.

28 Yikho-ke umuntu uyacikizeka njengento ebolileyo, njengesigqoko esidliwe yinondo.